ඌව පළාතේ දීර්ඝ කාලයක සිට නීත්යානුකූල බලපත්ර නොමැතිව ඉඩම් භුක්ති විඳිමින් සිටි ජනතාවගේ ඉඩම් අයිතිය තහවුරු කිරීමේ අරමුණින් ඉඩම් බලපත්ර 10,731 ක් ප්රදානය කිරීමේ දැවැන්ත වැඩසටහනක් පසුගියදා සාර්ථකව ක්රියාත්මක කෙරිණි.
කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශය සහ ඌව පළාත් ඉඩම් කොමසාරිස් දෙපාර්තමේන්තුව ඒකාබද්ධව බදුල්ල දිස්ත්රික්කය පුරා මෙම වැඩපිළිවෙළ දියත් කර තිබුණි. ඒ යටතේ ප්රාදේශීය ලේකම් කොට්ඨාස කිහිපයක ජනතාව වෙනුවෙන් නිල වශයෙන් ඉඩම් බලපත්ර ප්රදානය කිරීම සිදු වූ අතර, එහි ප්රතිලාභීන් සංඛ්යාව පහත පරිදි වේ:
- රිදීමාලියද්ද ප්රාදේශීය සභා බලප්රදේශය – ප්රතිලාභීන් 744 යි
- මහියංගණය ප්රාදේශීය සභා බලප්රදේශය – ප්රතිලාභීන් 451 යි
- සොරණාතොට ප්රාදේශීය සභා බලප්රදේශය – ප්රතිලාභීන් 246 යි
- මීගහකිවුල ප්රාදේශීය සභා බලප්රදේශය – ප්රතිලාභීන් 229 යි
- කන්දකැටිය ප්රාදේශීය සභා බලප්රදේශය – ප්රතිලාභීන් 141 යි
- බදුල්ල ප්රාදේශීය සභා බලප්රදේශය – ප්රතිලාභීන් 30 යි
ජනතාවගේ සමාජීය හා ආර්ථික ස්ථාවරත්වය ශක්තිමත් කිරීම වෙනුවෙන් ක්රියාත්මක වන මෙවැනි වැඩසටහන්, මෙරට දිගුකාලීන සංවර්ධන ඉලක්ක කරා යන වැදගත් පියවරක් ලෙස සැලකේ.
මෙම විශේෂ අවස්ථාව සඳහා ගෞරවනීය මහා සංඝරත්නය, ආදිවාසී නායක ඌරුවරිගේ වන්නිල ඇත්තන්, ඌව පළාත් ආණ්ඩුකාර කපිල ජයසේකර, වැවිලි හා ප්රජා යටිතල පහසුකම් අමාත්ය සමන්ත විද්යාරත්න, ඉඩම් හා වාරිමාර්ග නියෝජ්ය අමාත්ය අරවින්ද සෙනරත් විතාරණ, තරුණ කටයුතු පිළිබඳ නියෝජ්ය අමාත්ය දිනිඳු සමන් හෙන්නායක සහ බදුල්ල දිස්ත්රික් පාර්ලිමේන්තු මන්ත්රී සුදත් බලගල්ල යන මහත්වරුන් ඇතුළු ආරාධිතයින් රැසක් සහභාගී වූහ.
එමෙන්ම බදුල්ල දිස්ත්රික් ලේකම් සුනිල් ගලගම මහතා ඇතුළු පළාතේ ප්රාදේශීය සභා සභාපතිවරුන්, ඌව පළාත් සභාවේ උසස් නිලධාරීන්, ප්රාදේශීය ලේකම්වරුන් සහ ප්රතිලාභී ජනතාව විශාල පිරිසක් ද මෙම අවස්ථාවට එක්ව සිටියහ.